Pag-ibig sa Kalsada: Ang Kwento ni Mori Rui sa Pagkupkop ng mga Anghel
ni NARVAEZ, Rossyvett Gabrielle, 3-2N
Pag-ibig sa Kalsada: Ang Kwento ni Mori Rui sa Pagkupkop ng mga Anghel
Sa mga maliliit na kalsada at mga sulok ng Las Piñas, may iba't ibang ngiti at pag-asa na bumabalot sa mga hayop na itinuturing na mga 'stray'. Sa likod ng mga pintuan at sa mga puso ng ilan, naroroon ang isang babaeng handang magbukas ng pinto para sa mga naliligaw na kaluluwa ng mga alagang hayop - si Mori Rui.
Si Mori Rui, isang babaeng may 51 taong gulang, hindi lamang isang taga-turo sa Ingles (ESL) kundi isang tanglaw sa mga alagang hayop na walang tahanan. Mula pa noong kanyang kabataan, ang kanyang pamilya ay puno ng pagmamahal sa mga aso at pusa. Ngunit sa kanyang kuwento, ang pagmamahal sa mga hayop ay hindi lamang biro - ito'y isang misyon.
Ang buhay ni Mori Rui ay nabago nang biglang sumulpot sa kanilang bakuran ang isang pusang may matamis na ngiti. Ito ang naging simula ng kanyang pagmamahal sa mga hayop na palaboy. Sa halip na pumunta sa petshop, dinala na lang nila sa kanilang tahanan ang pusang iyon na pinangalanan nilang Aiji. Mula noon, hindi na natapos ang kanyang pagtulong sa mga hayop.
Sa tulong ng PAWS (Philippine Animal Welfare Society), naging aktibong boluntaryo si Mori. Ang una niyang inalagaang hayop ay si Raisin, isang stray cat na dinala niya sa kanilang tahanan. Mula noon, patuloy na dumami ang mga alagang hayop sa kanilang bahay, dahil sa kanyang walang sawang pagsisikap na magligtas at mag-alaga.
Subalit hindi madali ang lahat. Sa kanyang mga rescue missions, maraming pagsubok at peligro ang kanyang hinaharap. Minsan, kailangan niyang bumaba sa mga lugar na delikado, tulad ng creak at drainage, upang iligtas ang mga hayop. May mga insidente rin na nagresulta sa kanyang pakikibaka sa mga masasamang tao at barangay. Ngunit sa kabila ng lahat ng ito, patuloy siyang naglilingkod sa mga hayop na nangangailangan.
Laban din si Mori sa mga breeder, na naglalako ng mga hayop para sa tubo lamang. Sa halip, pinapalaganap niya ang kahalagahan ng pag-adopt ng mga stray pets at pagbibigay sa kanila ng bagong pag-asa.
Mula pa noong kanyang kabataan, batid na ni Mori ang kahalagahan ng pag-aalaga sa mga alagang hayop. Ang kanyang pamilya ay puno ng pagmamahal sa mga aso, at ang kanyang ate naman ay isang certified cat person. Subalit, ang pinakamalaking impluwensiya sa kanya ay ang kanyang lolo, isang Europian Filipino, na nagbigay sa kanya ng malalim na aral sa pag-aalaga ng mga hayop. Sabi niya, "Kung gusto mo ng aso, dapat matutunan mong alagaan ang aso."
Sa kanyang paglaki, naging bahagi na ng kanyang buhay ang pagtulong sa mga hayop na nangangailangan. Sa edad na limang taon, mayroon na silang aspin, at mula noon, hindi na nawalan ng pwesto sa kanilang tahanan ang mga hayop.
Sa kanyang mga karanasan, may mga hayop siyang tinawag na kanyang mga kaibigan. Isa na rito si Toshi, na kahit may kidney problem, nagtagal ng 13 taon sa kanilang piling. Subalit mayroon ding malulungkot na kuwento, tulad ni Tags na patuloy na lumalaban matapos tahiin ang katawan dahil sa pagtaga at si Jaws na na-dislocate ang panga dahil sa pagkabundol.
Sa kabila ng mga hamon, patuloy na naglilingkod si Mori Rui sa kanyang komunidad, patunay na ang pagmamahal at pag-aalaga sa mga hayop ay hindi lamang tungkulin kundi pati na rin isang biyaya. Si Mori Rui, kasama ang kanyang mga alagang hayop, ay patunay na ang pagmamahal ay hindi lamang nararamdaman kundi ito'y ginagawa. Sa bawat yugto ng kanyang buhay, patuloy siyang naglalakbay sa landas ng pagmamahal at kabutihan.
Sa huli, ang kanyang mensahe sa mundo ay simple ngunit may malalim na kahulugan: “May buhay din sila..” – Mori Rui